投資技巧 (一)

1. 一般而言，「投資的我」容易賺錢過「投機的我」。 投資的我最好買大股，唔係藍籌，都係大公司、大集團的股份，這些股票較有紋路，若要買小一點的實業股，佢地帳目唔易分析，要嚴格挑選，甚至定好止蝕位。

2.「投資的我」首重控制風險，想控制風險難免有睇錯的機會，睇錯等如會賺少，但以賺少換取唔輸或少輸是值得的。所以「投資的我」應關心一些起碼影響公司業務三幾年的大方向。當有確實跡象隻股的業績開始轉壞，亦比較肯定未必可以在一年半載內搞番掂時，候機減持一部份係良好的避險方式。即使睇錯，也只是賺少的問題，萬一睇，隻股減持完係咁跌，就可以減少組合輸錢的風險。自己得多的投資股份，見佢有原因下跌，唔好盲目咁增持，第一個反應唔係諗好唔好增持，係要諗需唔需要減持。減持一隻表現差的股票，減少它在組合中的比例，係避免一隻大股轉勢向壞就殺死自己的風險。

3. 「投資的我」唔睇好一隻股票，唔等如一隻股唔會升。千萬不要將基本因素轉壞或者已經好壞，當成為股份變化的唯一因素，股份下跌不是一條直線，而且跌得好甘時會大反彈，跌得多彈得急，跌得過份彈得驚人，所以巨股轉勢下跌時，當中會有好多次大反彈，直至尋到底為止。換一個「投機的我」的角度，升可以炒，跌也可以炒，即使明知一隻股大勢向下，但佢跌得好甘時，買入博短亦得。當然大跌時撈貨，要定好止蝕保護自己。好似匯控呢種跌到33元唔知點解會跌到人喊的股份，大跌時自然蘊藏大反彈走中短線的機會。好似花旗跌到0.97美元，有老外朋友問我點睇，我話炒得過，但唔係投資得過，佢跌到咁是因為有執笠風險，控制注碼炒就得，博命就唔好啦。你可以話我呢種態度好難一朝發達，我都同意，但睇全世界數一數二有錢的巴菲特都係靠每年賺20%、盡量年年唔輸錢長賺長有起家，你又做乜急得咁緊要要自己投資年年賺一倍呢?

4. 匯控並不是永遠都唔得，正如和黃也不是永遠都唔得一樣，問題係匯控做乜令人開始覺得佢得番。假設明天匯控公布出售了美國的次按業務，就可能是轉勢的開始，當然，這只是假設而矣。又例如美國樓市出現明顯見底回升之象，匯控美國按揭組合業務急促改善，就係匯控轉勢之時。問題是匯控轉勢之前，就真係唔使咁急買佢，萬一佢兩三年都未轉勢，投資的金錢就會喪失好多機會成本了。

5. 股價唔上都唔係大問題，盈利唔上才是大問題。你去年買2828恒生國企指數基金，內地股市唔好，2828都無乜表現，但國企指數成份股去年盈利其實相當唔錯，你有一隻股佢賺錢但市場唔買佢，佢有息派其實亦無大壞，呢個又變番短線回報和長線回報的問題，我又信有盈利支持的股票，長線應該無壞，說到底，公司賺到錢，就係投資者買佢股票最大的安全網。

6. 長線投資股份如何決定是否沽出，是一個極其複雜的問題，要答這個問題，要從基本入手。要睇一隻股份的價值，睇佢市價係唔係平過合理價值好多，來決定是否抵買。計算價值的方法是計算公司長時期的現金流，將之貼現成一個現價，比對現時的股價。睇緊公司中長線賺唔賺錢，若中長線公司會賺大錢，盈利會不斷升，而現價不貴，就可以買進。 將複雜問題簡單化，我們要決定長線投資一間公司，起碼要答到一個問題，你估目標公司在可見的將來如兩三年，它的純利會否穩定地上升? 若然答案為是，再問升幅有無雙位數字? 若然答案亦係肯定，那麼這間公司都似似地一間增長型的公司，如果要將範圍收窄到一些較大或較有名望的公司(以避開一些三四線公司)，目標就會少好多。

7.一隻本來好好的投資對象股份，因為種種問題變酸，關鍵就係核心業務出問題，令核心業務的增長不但不能維持，盈利仲可能倒退。有時出現這些核心業務問題是暫時性或個別性(例如匯控的美國次按業務本來是個別性，或者和黃的3G業務亦係個別性，或國壽投資內地股市和債市回報不前，但這些暫時性因素或業務佔的份額太大，所以產生的負面效果很大)，有些可能是結構性(如香港電訊升去國際通訊專營權、如中移動因為內地流動電話市場競爭日大盈利難以維持增長)。若出問題的核心業務負面因素消除(如和黃的3G開始捱到平手)，隻股可以轉勢。

8. 大朋友炒股，先在低價收貨在手，然後炒高，自己放消息也好、知道公司快有好消息也好、知道大市可以炒一轉也好，總之最後有理由炒高，到炒高的理由公告天下之時，就是大朋友放貨之日，佢貨咁多無好消息無人接走唔到，你聽到人所共知的好消息去入場時，好大機會模頂，因為大朋友離場之後，股票由強手轉到弱手中，好多時難逃反覆向下的命運，因為老散根本無能力買起一隻股票。當然，我講的是炒股，不是講公司基本因素，如公司基本因素好強，炒完隻股都未必死得。

9. 申請新股，要有選擇性，要善擇好股才去申請。

10. 減持弱股，增持好股，是增加回報一個基本方法。